ინფორმაციული ტექნოლოგიების დეპარტამენტის დებულება

მუხლი 1. ზოგადი დებულებანი

1. წინამდებარე დებულება განსაზღვრავს სსიპ საქართველოს სპორტის სახელმწიფო უნივერსიტეტის (შემდგომში – უნივერსიტეტი) ინფორმაციული ტექნოლოგიების დეპარტამენტის (შემდგომში – დეპარტამენტი) სამართლებრივ სტატუსს, ამოცანებსა და ფუნქციებს, სტრუქტურას, ანგარიშვალდებულებას და აწესრიგებს მის საქმიანობასთან დაკავშირებულ სხვა საკითხებს.
2. დეპარტამენტი წარმოადგენს უნივერსიტეტის სტრუქტურულ ერთეულს, რომელიც თავის საქმიანობაში  ხელმძღვანელობს  საქართველოს  კანონმდებლობით,  საქართველოს  კანონით „უმაღლესი განათლების შესახებ“, უნივერსიტეტის შიდა სამართლებრივი აქტებით, წინამდებარე დებულებითა და სხვა საკანონმდებლო და კანონქვემდებარე ნორმატიული აქტებით.
3. დეპარტამენტი ანგარიშვალდებულია უნივერსიტეტის ადმინისტრაციის ხელმძღვანელის წინაშე და ასრულებს მის მითითებებსა და დავალებებს.

 

მუხლი 2. დეპარტამენტის საქმიანობის სფერო და ფუნქციები

დეპარტამენტის საქმიანობის სფერო და ფუნქციებია:

1. ქსელის ადმინისტრირების მიმართულებით:
   • სასერვერო და ქსელური ინფრასტრუქტურის დანერგვა და შემდგომი ადმინისტრირება უნივერსიტეტის მასშტაბით;
   • უნივერსიტეტის ქსელური ინფრასტრუქტურის უსაფრთხოების უზრუნველყოფა და მართვა;
   • უსადენო ქსელის (Wi-Fi) ადმინისტრირება;
   • კომპიუტერული ქსელის ინფრასტრუქტურის დოკუმენტირება;
   • კომპიუტერული ქსელში ხარვეზების გამოვლენა, მათი სწორად იდენტიფიცირება და დროულად აღმოფხვრის უზრუნველყოფა, საჭიროების შემთხვევაში მწარმოებელთან კომუნიკაცია;
   • VoIp ქსელის მართვა;
   • ინტერნეტ წვდომების ფილტრების, Firewall და VPN კავშირების მართვა და მხარდაჭერა;
   • ქსელის, მომხმარებლები და მათთან დაკავშირებული აქტივობების, მოვლენების ზედამხედველობა;
   • Firewall-ზე წვდომის მართვა;
   • კომპიუტერული ქსელის საბაზისო დიაგნოსტირება.
2. ტექნიკური მხარდაჭერის მიმართულებით:
   • უნივერსიტეტის ბალანსზე რიცხული კომპიუტერული ტექნიკის შეუფერხებელი და გამართული მუშაობის უზრუნველყოფა;
   • შესაძლებლობის ფარგლებში ტექნიკის შეკეთება;
   • უნივერსიტეტის კომპიუტერული ტექნიკის პროგრამული უზრუნველყოფის გამართული მუშაობის უზრუნველყოფა და პერიოდული განახლება;
   • უნივერსიტეტის პერსონალისთვის და სტუდენტებისათვის კომპიუტერული ტექნიკისა და თანამედროვე პროგრამული საშუალებების ეფექტურად გამოყენების მიზნით შესაბამისი კონსულტაციების გაწევა, საჭიროების შემთხვევაში მათთვის შესაბამისი ტრენინგების დაგეგმვა და ჩატარება;
   • თავისი კომპეტენციის ფარგლებში უნივერსიტეტის ბიზნეს პროცესების მართვის ხელშეწყობა;
   • უნივერსიტეტის ვებ გვერდის ადმინისტრირების ხელშეწყობა.

 

მუხლი 3. დეპარტამენტის სტრუქტურა და თანამშრომლები

1. დეპარტამენტს ხელმძღვანელობს დეპარტამენტის უფროსი. დეპარტამენტის უფროსს რექტორთან შეთანხმებით თანამდებობაზე ნიშნავს და ათავისუფლებს ადმინისტრაციის ხელმძღვანელი. დეპარტამენტის უფროსი პასუხისმგებელია დეპარტამენტზე დაკისრებული ფუნქციების შესრულებაზე და ანგარიშვალდებულია ადმინისტრაციის ხელმძღვანელის წინაშე.
2. უნივერსიტეტის საშტატო განრიგით გათვალისწინებული თანამდებობებია: დეპარტამენტის უფროსი, დეპარტამენტის უფროსის მოადგილე, მთავარი სპეციალისტები.
3. დეპარტამენტის უფროსს ჰყავს მოადგილე, რომელსაც დეპარტამენტის უფროსის წარდგინებით თანამდებობაზე ნიშნავს ადმინისტრაციის ხელმძღვანელი.
4. დეპარტამენტის თანამშრომლებს თანამდებობებზე ნიშნავს და ათავისუფლებს უნივერსიტეტის ადმინისტრაციის ხელმძღვანელი, დეპარტამენტის უფროსის წარდგინებით.
5. დეპარტამენტის უფროსის დროებით არყოფნის (შვებულება, მივლინება, ავადმყოფობა, დროებით – 2 დღეზე მეტი ვადით არყოფნა), აგრეთვე დეპარტამენტის უფროსის დავალების შემთხვევაში, მის მოვალეობას ასრულებს დეპარტამენტის უფროსის მოადგილე.

მუხლი 4. დეპარტამენტის უფროსი

1. დეპარტამენტის უფროსი:
   • ხელმძღვანელობს და წარმართავს დეპარტამენტის საქმიანობას;
   • ანაწილებს მოვალეობებს დეპარტამენტის თანამშრომლებს შორის, აძლევს მათ შესაბამის დავალებებსა და მითითებებს;
   • უნივერსიტეტის რექტორსა და ადმინისტრაციის ხელმძღვანელს წარუდგენს დეპარტამენტის საქმიანობის შესახებ წლიურ ანგარიშს;
   • პერიოდულად ისმენს დეპარტამენტის თანამშრომლების ანგარიშს მათ მიერ შესრულებული სამუშაოს შესახებ;
   • საკუთარი კომპეტენციის ფარგლებში ვიზირებას უკეთებს დეპარტამენტში მომზადებულ დოკუმენტებს;
   • პასუხისმგებელია მის დაქვემდებარებაში მყოფი დეპარტამენტის თანამშრომლების შეფასებაზე, წახალისებაზე, განვითარებაზე, მოტივაციაზე, დისციპლინარული ღონისძიებების ინიცირებაზე, ითანხმებს ან/და თავად განსაზღვრავს დეპარტამენტის მიერ შესასრულებელი სამუშაოს ვადებს;
   • პასუხისმგებელია დეპარტამენტზე დაკისრებული ამოცანებისა და ფუნქციების შესრულებაზე;
   • ახორციელებს დაქვემდებარებული თანამშრომლების შეფასებას;
   • მონაწილეობს ან თავად უწევს ორგანიზებას და კონტროლს დეპარტამენტისა და მისი სტრუქტურული ერთეულების საქმიანობას, არეგულირებს და წყვეტს პროფესიულ და ორგანიზაციულ პრობლემებს, რომლებსაც განსაკუთრებული მნიშვნელობა აქვს დეპარტამენტის ეფექტური მუშაობისთვის;
   • ითანხმებს და პასუხისმგებელია დეპარტამენტის მიერ შესრულებულ ფუნქციებზე, პროცედურებზე, დასკვნებზე, ანგარიშებზე და სხვადასხვა სახის აქტივობებზე;
   • ასრულებს რექტორისა და ადმინისტრაციის ხელმძღვანელის მითითებებს წინამდებარე დებულებით განსაზღვრული კომპეტენციის ფარგლებში.
2. დეპარტამენტის უფროსის არყოფნის შემთხვევაში დეპარტამენტის უფროსის მოვალეობას ასრულებს დეპარტამენტის უფროსის მოადგილე.

 

მუხლი 5. დეპარტამენტის უფროსის მოადგილე

1. დეპარტამენტის უფროსის მოადგილე:
   • მონაწილეობს დეპარტამენტის მიერ შესასრულებელი ამოცანების    პრიორიტეტულობის განსაზღვრაში;
   • დეპარტამენტის თანამშრომლებს აძლევს რჩევებსა და რეკომენდაციებს მუშაობის ხარისხის გაუმჯობესებისა და განვითარების მიზნით;
   • აკონტროლებს და ხელს უწყობს დეპარტამენტისთვის დასახული ამოცანების შესრულების პროცესს;
   • დეპარტამენტის უფროსის დავალებით ასრულებს დეპარტამენტის კომპეტენციასთან დაკავშირებულ სხვა ფუნქციებს;
   • ახორციელებს დაქვემდებარებული თანამშრომლების შეფასებას;
   • ასრულებს უნივერსიტეტის ადმინისტრაციის ხელმძღვანელის და დეპარტამენტის უფროსის სხვა დავალებებს და ანგარიშვალდებულია მათ წინაშე;
   • ასრულებს ამ დებულებით, შინაგანაწესით, უნივერსიტეტის მართვის ორგანოების და დეპარტამენტის ხელმძღვანელის მიერ სამსახურეობრივ საქმიანობასთან დაკავშირებულ მოვალეობებსა და ცალკეულ დავალებებს;
   • დეპარტამენტის უფროსის არყოფნის შემთხვევაში ასრულებს დეპარტამენტის უფროსის მოვალეობას.

 

მუხლი 6. დეპარტამენტის მთავარი სპეციალისტები

დეპარტამენტის მთავარი სპეციალისტების უფლება/მოვალეობები და ფუნქციები განსაზღვრულია მათთან გაფორმებული შრომითი ხელშეკრულებებითა და სამუშაო აღწერილობებით.

მუხლი 7. დასკვნითი დებულებები

1. დებულებაში ცვლილებებისა და დამატებების შეტანა ხორციელდება საქართველოში მოქმედი კანონმდებლობით დადგენილი წესით.
2. დეპარტამენტის რეორგანიზაცია და ლიკვიდაცია ხორციელდება საქართველოში მოქმედი კანონმდებლობით დადგენილი წესით.
3. დებულება ძალაშია საქართველოს სპორტის სახელმწიფო უნივერსიტეტის წარმომადგენლობითი საბჭოს მიერ მისი დამტკიცების მომენტიდან.
4. დებულება ძალას კარგავს ახალი დებულების დამტკიცების ან/და დეპარტამენტის ლიკვიდაციის შემთხვევაში.